Isaya 12

¹Katika siku ile utasema: “Nitakusifu wewe, Ee Bwana . Ingawa ulinikasirikia, hasira yako imegeukia mbali nawe umenifariji.

²Hakika Mungu ni wokovu wangu; nitamtumaini wala sitaogopa. Bwana , Bwana , ni nguvu zangu na wimbo wangu; amekuwa wokovu wangu.”

³Kwa furaha mtachota maji kutoka visima vya wokovu.

⁴Katika siku hiyo mtasema: “Mshukuruni Bwana , mliitie jina lake; julisheni miongoni mwa mataifa yale aliyoyafanya, tangazeni kuwa jina lake limetukuka.

⁵Mwimbieni Bwana , kwa kuwa ametenda mambo makuu, hili na lijulikane duniani kote.

⁶Pazeni sauti mwimbe kwa furaha, watu wa Sayuni, kwa maana mkuu ni yeye Aliye Mtakatifu wa Israeli miongoni mwenu.”