Zaburi 121

¹Nayainua macho yangu nitazame vilima, msaada wangu utatoka wapi?

²Msaada wangu hutoka kwa Bwana , Muumba wa mbingu na dunia.

³Hatauacha mguu wako uteleze, yeye akulindaye hatasinzia,

⁴hakika, yeye alindaye Israeli hatasinzia wala hatalala usingizi.

⁵Bwana anakulinda, Bwana ni uvuli wako mkono wako wa kuume,

⁶jua halitakudhuru mchana, wala mwezi wakati wa usiku.

⁷Bwana atakukinga na madhara yote, atayalinda maisha yako,

⁸Bwana atakulinda unapoingia na unapotoka, tangu sasa na hata milele.